महेन्द्रनगर । कञ्चनपुरको वेदकोट नगरपालिका–६ सिसैयाकी हिरा जैसी सिमाले बनाएका अचारहरुले अहिले सुदूरपश्चिमा मात्रै नभएर काठमाण्डौ सम्म बजार पाएको छ । एक वर्ष अघि आधा केजी कुखुराको मासुको अचार बनाउनु सुरुवात गर्नु भएको सिमाले अहिले दैनिक १५ देखी २० किलोग्रामका्े अचार बनाउने गर्नु भएको छ ।
अहिले डल्ले खुर्सानी, लप्सी, आँप लगायतको अचार बनाउने काम गरिरहनु भएको छ । सामाजिक सञ्जालमा विभिन्न प्रकारका अचार बनाउने तरिका हेरेर सीप सिकेकी जैसी अहिले आफ्नै अचार उद्योग सञ्चालन गर्दै मासिक ३० देखि ४० हजार रुपैयाँसम्म आम्दानी गर्न सफल हुनुभएको छ ।
जैसीले करिब एक वर्षअघि सामाजिक सञ्जालमार्फत अचार बनाउने विभिन्न विधि हेर्न थाल्नुभएको थियो । सुरुमा घरायसी प्रयोजनका लागि अचार बनाउन सिक्नुभएकी उहाँले विस्तारै त्यसैलाई व्यवसायका रूपमा अगाडि बढाउने सोच बनाउनु भयो ।
सामाजिक सञ्जालमा उपलब्ध सामग्री हेरेर विभिन्न किसिमका अचार बनाउने तरिका सिक्दै अभ्यास गर्न थालेपछि उहाँले व्यावसायिक रूपमा अचार उत्पादन गर्ने निर्णय गर्नुभएको हो । वेदकोट नगरपालिका विभिन्न सामाजिक संघसंस्थाहरुको सहयोगले अहिले व्यवसायिक रुपमा ‘सिमा ड्राई फुड तथा मसाला अचार उद्योग’ सञ्चालनमा ल्याउनु भएको छ । घरायसी स्तरबाट सुरु भएको उहाँको व्यवसाय अहिले विस्तार हुँदै गएको छ ।
विभिन्न प्रकारका अचार उत्पादन गरी स्थानीय बजार तथा बाहिरी जिल्लामा समेत बिक्री वितरण गर्दै आउनुभएको उहाँले बताउनु भयो । अचार बनाउन आवश्यक पर्ने कच्चा पदार्थको व्यवस्थापनदेखि अचार तयार गर्ने, प्याकेजिङ गर्ने र बजारसम्म पु¥याउने काममा उहाँ आफैं र परिवारका सदस्यहरु पनि सक्रिय रहनुभएको छ ।
सुरुवाती चरणमा बजारको खोजी तथा ग्राहक बनाउन केही चुनौती भए पनि उत्पादनको गुणस्तर र स्वादमा ध्यान दिँदै निरन्तर काम गरेपछि ग्राहकको विश्वास बढ्दै गएको उहाँको भनाइ छ । जैसीका अनुसार उहाँले उत्पादन गरेका अचारको माग कञ्चनपुरमा मात्रै सीमित छैन ।
सुदूरपश्चिम प्रदेशका विभिन्न जिल्लाका साथै काठमाडौंसम्म पनि आफ्ना उत्पादन पठाउँदै आउनुभएको छ । सामाजिक सञ्जालमार्फत उत्पादनको प्रचारप्रसार गर्दा नयाँ ग्राहकसम्म पुग्न सहज भएको उहाँको अनुभव छ।
विशेषगरी सामाजिक सञ्जालमा उत्पादनको जानकारी, अचारका विभिन्न परिकार तथा प्याकेजिङका विषयमा जानकारी राख्दा ग्राहकले चासो देखाउने गरेका छन्।
सामाजिक सञ्जालबाटै अचार बनाउने सीप सिकेकी जैसी अहिले त्यही माध्यमलाई आफ्नो उत्पादनको प्रचारप्रसार र बजार विस्तारका लागि समेत प्रयोग गरिरहनुभएको छ । व्यवसायबाट हाल मासिक करिब ३० देखि ४० हजार रुपैयाँसम्म आम्दानी भइरहेको उहाँले बताउनुभयो।
आम्दानीसँगै आफ्नै व्यवसाय सञ्चालन गरेको आत्मसन्तुष्टि पनि मिलेको उहाँको भनाइ छ। घरपरिवारको कामसँगै व्यवसायलाई अगाडि बढाउँदै आएकी जैसीले महिलाले चाहना र मेहनत गरे घरमै बसेर पनि राम्रो आम्दानी गर्न सकिने बताउनुभयो।
उहाँका लागि यो व्यवसाय आम्दानीको स्रोत मात्रै नभई आत्मनिर्भर बन्ने माध्यमसमेत बनेको छ। विगतमा सामाजिक सञ्जालमा अरूले बनाएका अचार हेरेर सिक्ने गरेकी जैसी अहिले आफ्नै उत्पादन बजारमा पु¥याउने अवस्थामा पुग्नुभएको हो।
अचार उद्योग सञ्चालनका क्रममा उहाँले उत्पादनको स्वाद, सरसफाइ, गुणस्तर र प्याकेजिङलाई विशेष प्राथमिकता दिँदै आउनुभएको छ। ग्राहकले एकपटक प्रयोग गरेपछि पुनः माग गर्ने वातावरण बनाउन गुणस्तरीय उत्पादनमा ध्यान दिनुपर्ने उहाँको अनुभव छ।
ग्राहकको रुचि र मागअनुसार नयाँ–नयाँ स्वादका अचार उत्पादन गर्ने प्रयाससमेत भइरहेको उहाँले बताउनुभयो। सामाजिक सञ्जालबाट सिकेको सीपलाई व्यवसायमा परिणत गर्न सकिन्छ भन्ने उदाहरणसमेत जैसीको व्यवसायले प्रस्तुत गरेको छ। इन्टरनेट तथा सामाजिक सञ्जालमा उपलब्ध ज्ञान र सीपलाई सही रूपमा प्रयोग गर्न सके स्वरोजगारका अवसर सिर्जना गर्न सकिने उहाँको अनुभव छ।
पछिल्लो समय महिलाहरू घरायसी काममा मात्रै सीमित नभई विभिन्न व्यवसाय तथा उद्यममा जोडिन थालेका छन्। विशेषगरी खाद्य सामग्री, घरेलु उद्योग, हस्तकला, कृषि तथा पशुपालनलगायतका क्षेत्रमा महिलाहरूले आफ्नै व्यवसाय सञ्चालन गर्दै आम्दानी गर्न थालेका छन्।
जैसीको अचार उद्योग पनि स्थानीय स्रोतसाधन र आफ्नै सीप प्रयोग गरेर सञ्चालन गरिएको घरेलु उद्यमको एउटा उदाहरण हो। उहाँले आगामी दिनमा व्यवसायलाई थप व्यवस्थित बनाउँदै उत्पादन बढाउने योजना बनाउनुभएको छ।
बजारको मागअनुसार अचारका नयाँ परिकार थप गर्ने, प्याकेजिङलाई अझ आकर्षक बनाउने र उत्पादनलाई सुदूरपश्चिमका अन्य जिल्लाका साथै देशका विभिन्न बजारसम्म पु¥याउने लक्ष्य रहेको उहाँले बताउनुभयो।
सामाजिक सञ्जाललाई केवल मनोरञ्जनका लागि मात्रै प्रयोग नगरी त्यसबाट सीप सिक्न र आम्दानीको बाटो खोज्न सकिने सन्देश जैसीको यात्राले दिएको छ। आफूले सिकेको सीपलाई निरन्तर अभ्यास र मेहनतका साथ व्यवसायमा रूपान्तरण गर्न सके घरमै बसेर पनि आर्थिक रूपमा आत्मनिर्भर बन्न सकिने उहाँको अनुभव छ।
एक वर्षअघि सामाजिक सञ्जालमा अचार बनाउने तरिका हेरेर सिक्न सुरु गरेकी हिरा जैसी अहिले आफ्नै उत्पादन बनाएर सुदूरपश्चिमका विभिन्न जिल्लादेखि काठमाडौंसम्म बजार विस्तार गर्ने अवस्थामा पुग्नुभएको छ।
मासिक ३० देखि ४० हजार रुपैयाँसम्म आम्दानी गर्दै अगाडि बढिरहनुभएकी जैसीको यो प्रयासले स्थानीयस्तरमा स्वरोजगार र महिला उद्यमशीलताको सम्भावनालाई समेत उजागर गरेको छ।
Comments are closed.