महेन्द्रनगर । सुदूर पहाड र भारतको उत्तराखण्डमा निरन्तर वर्षाका कारण महाकाली नदीमा पानीको बहाव उल्लेख्य रूपमा बढेको छ । जिल्ला विपद् व्यवस्थापन आपतकालीन कार्य सञ्चालन केन्द्र कञ्चनपुरका अनुसार मंगलबार बिहान ९ बजे नेपाल भारत जोड्ने बनबासास्थित शारदा ब्यारेजमा पानीको बहाव १ लाख ९ हजार १८४ क्युसेक मापन गरिएको छ ।
बढ्दो बहावका कारण शारदा ब्यारेज बनबासा पुल हुँदै हुने चार पाङ्ग्रे सवारीसाधनको आवागमन बन्द गरिएको छ । यद्यपि अन्य समग्र वस्तुस्थिति सामान्य रहेको आपतकालीन कार्य सञ्चालन केन्द्र कञ्चनपुरले जनाएको छ ।
यसअघि मंगलबार बिहान ३स्०० बजे सोही स्थानमा पानीको बहाव ८८ हजार ६९६ क्युसेक रहेको थियो । छ घण्टाको अवधिमा नदीको बहाव झण्डै २० हजार ५ सय क्युसेकले बढेको देखिएको छ ।
सुदूर पहाड र भारतको उत्तराखण्डमा अझै पनि वर्षा भइरहेकाले नदीको बहाव अझै बढ्न सक्ने सम्भावना रहेको भन्दै महाकाली नदी आसपासका तटीय क्षेत्रका बासिन्दालाई उच्च सतर्कता अपनाउन प्रशासनले आग्रह गरेको छ ।
नदी किनारमा अनावश्यक आवतजावत नगर्न, जोखिमयुक्त गतिविधि नगर्न तथा स्थानीय प्रशासन र सुरक्षा निकायबाट जारी सूचनाको पालना गर्न कञ्चनपुरका प्रमुख जिल्ला अधिकारी मदन कोइरालाले सर्वसाधारणलाई अनुरोध गरेका छन् ।
जल तथा मौसम विज्ञान विभागले पनि सुदूरपश्चिम प्रदेशका अधिकांश स्थानमा अझै केही दिन मध्यमदेखि भारी वर्षाको सम्भावना रहेको जनाएको छ ।
साना नदी, खोला तथा नालामा आकस्मिक बाढी आउन सक्ने भएकाले सतर्क रहन विभागले आग्रह गरेको छ ।
Comments are closed.