बझाङका १२ वटा स्थानीय तहमध्ये मष्टा गाउँपालिका पूर्ण खोप सुनिश्चितता गाउँपालिका घोषणा भएकोे छ । ‘स्थानीय स्वामित्व र सहभागिता पूर्ण खोप सुनिश्चितता हाम्रो प्रतिबद्धता’ भन्ने मूल नाराका साथ पालिकाभित्र रहेका सम्पूर्ण बालबालिकाले सबै किसिमका खोप लगाएपछि मष्टा गाउँपालिकालाई बझाङ जिल्लाकै पहिलो पूर्ण खोप सुनिश्चितता घोषणा गरिएको बझाङको मष्टा गाउँपालिकाका स्वास्थ्य शाखा उपप्रमुख भीम बोहराले बताउनु भयो ।
बझाङको पहिलो पालिकाका रूपमा मष्टा गाउपालिका पूर्ण खोप सुनिश्चितता भएको हो । मष्टा गाउँपालिकामा एक कार्यक्रमका बीच गाउँपालिकाका अध्यक्ष कर्णबहादुर कठायतले गाउँपालिकालाई पूर्णखोप सुनिश्चितता घोषणा गर्दै गाउँपालिकाका कुनै पनि नागरिकले स्वास्थ्य सेवाबाट वञ्चित नहुन् भनेर विशेष अभियानमूलक कार्यक्रम सञ्चालन गरिएको बताउनु भयो । उहाले निःशुल्क औषधोपचार, एम्बुलेन्स सेवा लगायतका स्वास्थ्य सेवा उपलब्ध गराउँदै आएको, सेवाबाट वञ्चित भएका नागरिकलाई समेत सेवा उपलब्ध गराएको बताउँदै पुर्ण खोपलाई दिगो बनाउन गाउँपालिका सदैव लागि पर्ने प्रतिबद्धता समेत गर्नु भयो ।
सात वडा रहेको बझाङको मष्टा गाउँपालिका क्षेत्रभित्रका १६ महिनादेखि २३ महिनासम्मका बालबालिकाले नियमित खोप प्राप्त गरेको आधारमा मष्टा गाउँपालिकालाई पूर्ण खोप सुनिश्चितता घोषणा गरिएको हो । नेपाल सरकारले तोकेबमोजिमको खोप क्लिनिक मार्फत सबै बालबालिकालाई खोप सेवा प्रवाह गरी खोप सुनिश्चितता घोषणा गरिएको हो । अन्य स्थानीय तहमा पनि यो अभियान चाँडै सम्पन्न हुने जिल्ला स्वास्थ्य कार्यालय बझाङका जनस्वास्थ्य अधिकृत मनोहर कार्कीले बताउनु भया्े ।