कैलालीको धनगढी उप–महानगरपालिका वडा नं १६ को बेहडाबाबामा ज्येष्ठ नागरिक मिलन भवनको आईतबार शिलन्यास गरिएको छ । कैलालीको धनगढी उप–महानगरपालिकाका नगर प्रमुख नृपबहादुर वडले शिलन्यास गर्नु भएको हो । भवन धनगढी उप–महानगरपालिकाको लगानीमा निर्माण हुन थालेको हो । भवनको शिलन्यास गर्दै नगरप्रमुख वडले भवन निर्माण भएपछि जेष्ठ नागरिकहरुलाई भेटघाट, छलफल गर्न सजिलो हुने बताउनु भयो ।
जेष्ठ नागरिक मिलन भवनलाई जेष्ठ नागरिकहरुको गफगाफ गर्ने, भेटघाट गर्ने ठाउँको रुपमा विकास गरिने बताउदै नगरप्रमुख वडले त्यसकारण जेष्ठ नागरिक मैत्री भवन निर्माण गर्न थालेका बताउनु भयो । भवनमा धनगढी उप–महानगरपालिकाको २० लाख रुपैया लगानी भैरहेको बताउदै कैलालीको धनगढी उप–महानगरपालिकाका डिभिजनल ईन्जिनियर द्धिजराज भट्टले त्यसको १० प्रतिशत स्थानीयको योगदान हुने बताउनु भयो । जेष्ठ नागरिक मिलन भवन बेहडाबाबा धामको नजिकै भएकाले मन्दिरको दर्शन गर्नका लागि पुग्ने जेष्ठ नागरिकहरुलाई समेत राहत पुग्ने ईन्जिनियर भट्टले बताउनु भयो ।