कैलालीको धनगढीमा सोमबारदेखि सुरु हुने ‘मुख्यमन्त्री कप राष्ट्रिय पुरुष भलिबल प्रतियोगिता’को ट्रफी र खेल तालिका सार्वजनिक

कैलालीको धनगढीमा सोमबारदेखि सुरु हुने ‘मुख्यमन्त्री कप राष्ट्रिय पुरुष भलिबल प्रतियोगिता’को ट्रफी र खेल तालिका सार्वजनिक गरिएको छ । आयोजक सुदूरपश्चिम प्रदेश खेलकुद परिषद्ले धनगढीमा पत्रकार सम्मेलन गर्दै ट्रफी र खेल तालिका सार्वजनिक गरेको हो । परिषद्का सदस्य सचिव दीपकबहादुर सिंहका अनुसार चैत १२ गतेसम्म सञ्चालन हुने राष्ट्रिय भलिबल प्रतियोगिताको उद्धघाटन खेल लु्म्बिनी प्रदेश र विभागिय टोली त्रिभुवन आर्मीबीच हुनेछ । सिंहले प्रतियोगिताको तयारी पनि पूरा भएको बताउनु भयो । प्रतियोगितामा सात वटा प्रदेश र तीन वटा विभागीय गरी १० टोलीको सहभागिता रहने बताउदै सदस्य सचिव सिंहले प्रतियोगिताको विजेताले नगद चार लाख, उपविजेताले दुई लाख, तेस्रो हुने टोलीले एक लाख र चौथो स्थान प्राप्त गर्ने टिमले ५० हजार नगदसहित ट्रफी र मेडल प्राप्त गर्ने बताउनु भयो । प्रतियोगिताको सर्वोत्कृष्ट खेलाडीलाई नगद २० हजार तथा उदयमान खेलाडी, उत्कृष्ट लिफ्टर, उत्कृष्ट स्पाइकर, उत्कृष्ट ब्लकर, उत्कृष्ट डिफेन्सर, उत्कृष्ट सर्वर र उत्कृष्ट प्रशिक्षकलाई जनही १० हजारसहित पुरस्कृत गरिने सुदूरपश्चिम प्रदेश खेलकुद परिषद्का सदस्य सचिव सिंहले बताउनु भयो । प्रत्येक खेलका म्यान अफ द म्याचलाई नगद एक हजार पाँच सय नगदसहित पुरस्कृत गरिनेछ । आयोजक सुदूरपश्चिम प्रदेश खेलकुद परिषद्का सदस्य सचिव सिंहले प्रतियोगिता सर्वाधिक पुरस्कार राशिको भएको दाबी गर्नु भयो । भलिबलका सबैभन्दा बढी खेलाडी सुदूरपश्चिम प्रदेशले नै जन्माएको बताउदै सुदूरपश्चिम प्रदेश खेलकुद परिषद्का सदस्य सचिव सिंहले तर सुदूरपश्चिममै राष्ट्रिय स्तरको भलिबल प्रतियोगिता हुन नसकेका कारण यसपटक आयोजना गर्न लागेका बताउनु भयो ।
को–को परे सुदूरपश्चिमको टिममा ?
प्रदेश खेलकुद परिषद्ले एक महिनादेखि प्रतियोगितामा सहभागीता जनाउने सुदूरपश्चिम प्रदेशको टिमलाई बन्द प्रशिक्षणमा राखेको छ । यसअघि भएको प्रदेशस्तरीय भलिबल प्रतियोगिताका उत्कृष्ट खेलाडीको क्याम्प चलिरहेको सुदूरपश्चिम प्रदेश खेलकुद परिषद्का सदस्य सचिव सिहंले बताउनु भयो । सुदुरपश्चिम प्रदेशको कप्तानको जिम्मेवारी महेश खत्रीले पाएका छन् । टिममा डम्मर भट्टराई, सन्तोष महता, प्रशान्त शाहु, निलम सिंह, दिनेश चन्द, सन्तोष खत्री, रोशन चन्द, सुरेन्द्र खड्का, सुरेन्द्र बिक, सुरेन्द्र भाट, विशाल भण्डारी, बलदेव धामी र वरुण ठगुन्ना परेका छन्। टिम प्रशिक्षकमा हिक्मतराज गिरी र व्यवस्थापकमा दिनेश गिरी रहेका छन् ।

सम्बन्धित

Leave A Reply

Your email address will not be published.