महेन्द्रनगर । कञ्चनपुरको वेदकोट नगरपालिकामा आन्तरिक रोजगार प्रवद्र्धनका लागि वैदेशिक रोजगारबाट फर्किएका व्यक्तिहरूलाई लक्षित गरी उद्यमशीलता प्रवद्र्धन कार्यक्रम सञ्चालन गरिएको छ । रोजगार, सीप तथा उद्यमशीलता केन्द्र, वेदकोट नगरपालिकाको आयोजनामा सुरु भएको उक्त कार्यक्रम पाँच दिनसम्म सञ्चालन हुने जनाइएको छ ।
कार्यक्रमको उद्देश्य वैदेशिक रोजगारबाट प्राप्त सीप, अनुभव र पूँजीलाई उत्पादनमूलक तथा स्वरोजगारमुखी क्षेत्रमा लगानी गर्न प्रेरित गर्नुका साथै स्थानीय स्तरमै रोजगारीका अवसर सिर्जना गर्नु रहेको आयोजकले जनाएको छ । तालिममा सहभागीहरूलाई व्यवसाय सञ्चालन, उद्यम विकास, वित्तीय व्यवस्थापन, बजार व्यवस्थापन, व्यवसाय योजना निर्माण तथा स्वरोजगारका सम्भावनाबारे जानकारी प्रदान गरिनेछ ।
साथै सफल उद्यमी बन्न आवश्यक ज्ञान, सीप र व्यवहारिक अनुभवसमेत साझा गरिने कार्यक्रम रहेको छ । कार्यक्रमलाइ सम्बोधन गर्दै नगर प्रमुख भोजराज बोहराले वैदेशिक रोजगारबाट फर्किएका दाजुभाइ तथा दिदीबहिनीहरूले विदेशमा सिकेको सीप, अनुभव र पुँजीलाई स्वदेशमै सदुपयोग गर्न सकून् भन्ने उद्देश्यले यो उद्यमशीलता प्रवद्र्धन कार्यक्रम सञ्चालन गरिएको बताउनु भयो ।
रोजगारीका लागि विदेश जानु मात्र विकल्प होइन, आफ्नै ठाउँमा उद्यम स्थापना गरी आत्मनिर्भर बन्न सकिन्छ भन्ने सन्देश दिन पनि यो कार्यक्रम महत्वपूर्ण रहेको जानकार िगराउनु भयो ।
वेदकोट नगरपालिकाले उत्पादन, स्वरोजगार र उद्यम विकासलाई प्राथमिकतामा राखेर विभिन्न कार्यक्रम सञ्चालन गर्दै आएको बताउँदै विभिन्न स्वरोजगार उन्मुख तालिम कार्यक्रमहरु पनि संचालन गरीएको बताउनु भयो ।
यस तालिमबाट सहभागीहरूले व्यावसायिक योजना निर्माण, उद्यम सञ्चालन तथा बजार व्यवस्थापन सम्बन्धी ज्ञान हासिल गरी सफल उद्यमी बन्ने विश्वास लिएको बताउनु भयो । यसैगरी नगर उपप्रमुख तुलसी जोशिले विदेशबाट फर्किएका युवाको सीप र अनुभवलाई स्थानीय स्तरमै उत्पादन तथा उद्यमसँग जोड्न नगरपालिकाले यो कार्यक्रम सञ्चालन गरेको हो ।
यसले स्वरोजगार सिर्जना गर्नुका साथै स्थानीय अर्थतन्त्रलाई समेत मजबुत बनाउने विश्वास लिएको बताउनु भयो । “वैदेशिक रोजगारबाट फर्किएका युवाहरूले विदेशमा आर्जन गरेको सीप, अनुभव र पूँजीलाई आफ्नै गाउँ–ठाउँमा सदुपयोग गर्न सके स्थानीय स्तरमै रोजगारी र आम्दानीका अवसर सिर्जना गर्न सकिने बताउनु भयो । यही उद्देश्यका साथ वेदकोट नगरपालिकाले आन्तरिक रोजगार प्रवद्र्धन तथा उद्यमशीलता विकास कार्यक्रम सञ्चालन गरेको हो । युवाहरूलाई आत्मनिर्भर बनाउने, स्वरोजगारमा जोड्ने र विदेश पलायनको बाध्यता कम गर्ने नगरपालिकाको लक्ष्य रहेको जानकारी गराउनु भयो ।
नगरपालिकाले उद्यमशीलता प्रवद्र्धनका लागि आवश्यक सहजीकरण, प्राविधिक सहयोग तथा सम्भावित साझेदारीमा निरन्तर साथ दिने प्रतिवद्धता जाहेर गर्नुभयो ।
वैदेशिक रोजगारबाट फर्किएका युवाहरूको ज्ञान, सीप र अनुभवलाई स्थानीय विकास तथा आर्थिक समृद्धिसँग जोड्न आवश्यक रहेको बताउनु भयो । उनीहरूले युवाहरूलाई आत्मनिर्भर र उद्यमशील बनाउन यस्ता कार्यक्रम प्रभावकारी हुने विश्वास व्यक्त गर्नुभयो ।
रोजगार संयोजक भोजराज अवस्थीले पाँच दिनसम्म सञ्चालन हुने उक्त कार्यक्रममा वैदेशिक रोजगारबाट फर्किएका युवा तथा इच्छुक उद्यमीहरूको सहभागिता रहेको बताउनु भयो । कार्यक्रमबाट सहभागीहरूलाई स्वरोजगार तथा साना व्यवसाय स्थापना गर्न प्रेरणा मिल्ने अपेक्षा गरिएको उहाँको भनाई रहेको छ ।
Comments are closed.