महेन्द्रनगर । काभा नेसन्स लिगमा नेपालले भारतलाई हराएको छ । शनिबार त्रिपुरेश्वरस्थित राष्ट्रिय खेलकुद परिषद्को कभर्डहलमा भएको रोमाञ्चक खेलमा नेपालले भारतलाई ३ र २ सेटले हराएको हो । खेलमा नेपालले पहिलो सेट २५ र १८ ले जितेको थियो।
दोस्रो सेटमा भारत २५ र १२ ले जितेसँगै खेल १ र १ को स्थितिमा आयो । तेस्रो सेटमा नेपालले २५ र १७ ले जित्यो भने चौथो सेटमा भारत २५ र १८ ले विजयी भयो । निर्णायक पाँचौं सेट १५ र १३ ले विजयी भएसँगै नेपालले ऐतिहासिक जित निकाल्यो ।
यसअघि नेपाल र भारतबीचको महिला भलिबलमा सबैभन्दा उत्कृष्ट प्रदर्शन २०१९ को सागको फाइनलमा दशरथ रंगशालामा थियो । उक्त खेलमा नेपाल ३–२ सेटले हार्दै स्वर्ण जित्नबाट चुकेको थियो । नेपालले पहिलो खेलमा श्रीलंकालाई ३–० को सोझो सेटमा हराएको थियो ।
भारतले पहिलो खेलमा ईरानलाई ३–१ र दोस्रो खेलमा माल्दिभ्सलाई ३–० को सोझो सेटमा हराएको थियो । प्रतियोगितामा नेपालसहित भारत, इरान, माल्दिभ्स र श्रीलंकाको सहभागिता छ ।