प्रधानमन्त्री कप एक दिवसिय पुरुष राष्ट्रिय क्रिकेट प्रतियोगिता अन्तर्गत आज पनि दुई खेल हुदै छन् । कीर्तिपुर स्थित टीयू अन्तर्राष्ट्रिय मैदानमा समूह ‘बी’ अन्तर्गत साविक विजेता नेपाल पुलिस क्लब र लुम्बिनी प्रदेशबीचको खेल हुनेछ भने मुलपानी क्रिकेट मैदानमा समूह ‘ए’ मा रहेका विभागीय टोली एपीएफ र गण्डकी प्रदेश बीचको खेल हुदैछ ।
हिजो भएको खेलमा सुदूरपश्चिमलाई ९ विकेटले पराजित गर्दै पुलिसले पहिलो जित हात पारेको थियो । उता लुम्बिनीले भने पहिलो खेलमा प्रदेश २ लाई पराजित गर्दै विजयी सुरुवात गरेको थियो ।
जारी प्रतियोगितामा लुम्बिनीको यो दोस्रो खेल हुनेछ । यस्तै आफ्नो पहिलो खेलमा प्रदेश १ लाई पराजित गरेको एपीएफ लगातार जित हात पार्ने योजनामा रहेको छ । उता गण्डकीले भने समूहमा तीन वटा खेल खेलिसक्दा एक खेल मात्र जितेको छ । समूह चरणमा गण्डकीको यो अन्तिम खेल हुनेछ ।