नेपालमा कोरोना भाइरसका ३०३ जना सङ्क्रमित थपिएका छन् । स्वास्थ्य तथा जनसंख्या मन्त्रालयले कोभिड १९ सम्बन्धी दैनिक विवरण अद्यावधिक गर्दै नेपालमा कोरोनाका कुल सङ्क्रमितको संख्या दुई लाख ७० हजार ९२ जना पुगेको छ । पछिल्लो चौबीस घण्टामा चार हजार ५७४ जनाको पीसीआर परीक्षण गर्दा कोरोना भाइरसका ३०३ जना सङ्क्रमित थपिएका हुन् । अहिलेसम्म २० लाख ५२ हजार ६८७ पीसीआर परीक्षण भइसकेको छ ।
देशका विभिन्न अस्पतालबाट २८५ जना सङ्क्रमित सङ्क्रमणमुक्त भई घर फर्केको स्वास्थ्य तथा जनसंख्या मन्त्रालयले जनाएको छ । यस्तै पछिल्लो २४ घण्टामा छ जना कोरोना सङ्क्रमितको ज्यान गएको पुष्टि भएको स्वास्थ्य तथा जनसंख्या मन्त्रालयले उल्लेख गरेको छ । सो सँगै मृतकसँगै नेपालमा कोभिडबाट मृत्यु हुने दुइ हजार १७ जना पुगेका छन् । हाल तीन हजार २५२ जनामा भाइरसको सङ्क्रमण सक्रिय छ भने तीन हजार २५२ जना आइसोलेशनमा र १२२ जना क्वारेन्टिनमा छन् । यस्तै पछिल्लो चौबीस घण्टामा काठमाडौं उपत्यकमा १७२ जना सङ्क्रमित थपिएका छन् ।