महेन्द्रनगर । नेपाली कांग्रेसले फागुन २१ गतेको हुने प्रतिनिधिसभा निर्वाचनमा भाग लिने निर्णय गरेको छ । शनिबार बसेको केन्द्रीय समिति बैठकबाट सो निर्णय गरेपछि नेकपा एमाले भने दबाबमा परेको छ । यसअघिसम्म निर्वाचनमा जाने नजाने दोधारमा रहेको कांग्रेस अन्ततः निर्णय नै गरेर चुनावमा जाने भएको हो ।
उसले विभिन्न कारण देखाउँदै निर्वाचनबाट पन्छिँदै आएको थियो । कांग्रेस अनिर्णीत हुँदा फाइदा पुगेको एमालेलाई भने अब गाह्रो पर्ने देखिएको छ । शनिबार कांग्रेसले निर्वाचनमा भाग लिने निर्णय गरेसँगै एमालेलाई दबाब पर्ने देखिएको छ, यद्यपि खुलेरै निर्वाचनमा नजाने निर्णय भने एमालेले पनि गरिसकेको छैन ।
तर उसले हरेक पटकको आफ्नो सबैखाले बैठक तथा सभा समारोहमा यो सरकारले निर्वाचन गराउन नसक्ने बताउँदै आइरहेको छ । कांग्रेसले अन्य राजनीतिक दललाई पनि चुनावमा भाग लिन आह्वान गरेको छ ।
फागुन २१ गते हुने प्रतिनिधिसभा निर्वाचनमा सबै राजनीतिक दलले उत्साहपूर्वक सहभागिता जनाउनुपर्ने उसले बताइरहेको छ । यता एमालेले निर्वाचनमा भाग नलिन मुख्य बहाना सुरक्षा कारण देखाइरहेको छ ।
जसका कारण चुनाव नै हुन सक्दैन भनिरहेको छ । एमालेको बागमती प्रदेश कमिटीले आज आयोजना गरेको जनसभामा बोल्ने एमालेका नेताहरूले वर्तमान सरकारले चुनाव गराउनै नचाहेको भनी आरोप लगाउँदै संसद् पुनर्स्थापनाको माग गरेका छन् ।
यसअघि एमालेका अध्यक्ष केपी शर्मा ओलीले जनताले सुरक्षाको प्रत्याभूति नगरेका कारण चुनाव नहुने बताएका थिए । जेलबाट अपराधीहरू भागेका छन्, प्रहरीका हतियारहरू लुटिएका छन्, यस अवस्थामा चुनाव गराउन सम्भव छैन,ु उनले भनेका थिए ।
Comments are closed.